البوست ده غالبا لما تفهمه هتبقي فهمت جزء كبير جداً من آلية العمل بتاع العربيه واللي هيسهل عليك جدا فهم حاجات كتير جاية ف نركز شوية بقي, معظم الكتب اللي بتشرح المحرك بتاع العربية ف هو بيقولك الأنواع بتاع المحرك الأول بعد كده يقولك بيشتغل إزاي بس غالباً لو قلتلك هو بيشتغل إزاي الأول وجيت كلمتك ع أنواعه هتبقي مستوعب أكتر ف يلا نبدأ علبركه, عشان تبقي فاهم احنا هنا بنتكلم علي محركات الاحتراق الداخلي وهنتكلم عن النوعين المشهورين جدا وهما البنزين والديزل(الجاز).
1- دورة أوتو (Otto cycle): دي يسيدي بتتكون من أربع أشواط واللي لازم تكون عارفهم بالترتيب كده(سحب, ضغط, قدرة, عادم)
-شوط السحب: بيتم سحب البنزين والهواء بنسبة معينة داخل الاسطوانات اللي ف المحرك.
-شوط الضغط: بيتم ضغط البنزين والهواء معا والضغط برضو بنسبة معينة بحيث ميوصلش البنزين لدرجة الإشتعال الذاتي, وخلال الشوط ده بيجي دور شمعات الإحتراق(البوجيهات) ودي بتعمل شرر كهربي يولع ف الخليط المضغوط وياخدنا للشوط التالت.
-شوط القدرة: غالبا انت خمنت ايه اللي ممكن يحصل, ايوه هيحصل انفجار عزيزي هيحصل انفجار بس داخل الاسطوانة وده الشوط اللي بنستفاد منه ف الحركه علشان الانفجار ده كأنه بيزيح البساتم تحد كده بقوة كبيرة وده اللي بيخلي عمود اسمه عمود الكرنك يلف وبعد كده ننقل اللفة ده لحد الجنوط.
-شوط العادم: بعد م حصل حريق وانفجار اكيد في غازات تروح فين! بالظبط كده هتطلع برا المحرك الي الشكمان الي ثقب الاوزون ايوه.
2- الديزل بقي تقدر تعتبره زي اللي فوق كده بس هنغير حاجات بسيطه
-شوط السحب: بيسحب هوا بس مش هوا وديزل.
-شوط الضغط: هيضغط الهوا اللي سحبة بنسبة معينة عشان يوصلة ل درجة حرارة الإشتعال لذاتي للديزل وفي نهاية الشوط يبدأ يضخ الديزل وندخل ل شوط القدرة.
-شوط القدرة: خلاص بقي انت عارف باقي الحوار الانفجار هيحصل والقدرة تتولد.
-شوط العادم: وتبدأ برضو الغازات الناتجة من التفاعل تطلع من الشكمان.
ويبدأ الموضوع ده يتكرر تاني, أياً كانت نسبة استيعابك للموضوع ف ده شئ عظيم, ولو في قصور ف أي جزء ف متقلقش هنذكر الموضوع ده بعد كده كتير.
#Automotive_Technology
Post a Comment